Sevenadur Breizh ha
sevenadur Bro Gembre 

An dañsoù:  

E bro Gembre...

Tri rummad dañsoù hengounel a zo : dañs ar botoù-koad (dawns y clogsen), dañsoù gouel ha dañsoù lez.

Gant botoù-koad hag ur skubellenn e vez dañset dawns y clogsen. Diskouez a ra ar baotred o ampartiz o lammat hag oc’h ober troioù-ouesk.

Gant ar violoñs e vez sonet an dañsoù gouel peurliesañ. Kalz a lusk a zo ganto. Dañsoù evel Rali Twm Sion ha Gwyl Ifan a zo skouerius eus ar mod dañsal-se.

Gant an delenn e vez sonet an dañsoù lez. Dañsoù siriusoc’h int. Er rummad-se emañ an dañsoù Llanofer Reel, Meillionnen ha Rhisiart Annwyl.

Tu zo ober gant ar piano, ar fleüt hag an akordeoñs evit seniñ an tonioù da zañsal.

N’eus ket kalz lec’hioù evit deskiñ dañsal. Abaoe un dregont vloaz bennak e teuont war wel en-dro, gant ar re yaouank dreist-holl. Gant kevredigezhioù e vez aozet Twmpathau (nozvezhioù da zañsal, d’ober toumpi) e-lec’h ma c’hall an dud deskiñ dañsal. Strolladoù dañserien o devez tro d’en em ziskouez ha kemer perzh en Eisteddfodau. Bez zo deus an Eisteddfod vroadel hag an Esisteddfodau lec’hel. Evit ar re yaouank e vez aozet lod gant an Urdd (kevre ar yaouankizoù kembreat).Digor d’an holl eo an Eisteddfod vroadel. Gouelioù kanañ ha dañsal a zo ivez evel Gwyl Cerdd Dant.

Er meilhoù e vez fardet an dilhad. Tennañ a reont tamm pe damm d’ar re a veze gwisket er c’hantvedoù kent, hervez ha diouzh an dañsoù.

E Breizh...

Gwechall e veze dañset da skouer da geñver an euredoù gant an dud war ar maez. Dañsoù a oa e pep bro, hag eurvezhioù-pad e vez e dañset o lidañ an abadenn pe an degouezh. Er bloavezhioù 40 eo bet krouet ar c’helc’hioù,keltiek (strolladoù dañserien dreist-holl) hag ar bagadoù (strolladoù sonerien). Hiziv ez a muioc’h a dud er festoù-noz hag er festoù-deiz, pa vefent tud ampart pe get, tuad kozh ha tud yaouank.

Plijadur hag entan evit an dañsoù a vez diskouezet gant an dud az a d’ar festoù-noz ha festoù-deiz. Bamus eo gwelet an dud o’n em lakaat da zañsal war al leur ( a c’hall bezañ porzh ar plas) kerkent ha sonet notennoù kentañ an ton. Tost bep noz zo ur fest-noz e Breizh-Izel e-pad an hañv.

E-kerz ar festivalioù evel Gouelioù-Meur Kerne e Kemper, pe Gouel ar Sant Loup e Gwengamp e kemer perzh ar c’helc’hioù keltiek e kenstrivadegoù ha dañsal a reont dirak an dud. Gwisket mod kozh int, hag a-wezhioù e vez graet an dilhad gant an dud o-unan. Disheñvel eo ar gizioù gwiskañ diouzh broioù Breizh.

E touez dañsoù anavezetañ Breizh e kaver ar gavotenn, an an-dro, al laridenn, ar plinn, rond Sant Visant. Gizioù hag adstummoù a zo diouzh ar broioù (gavotenn ar menez, gavotenn an Aven...).

Musik ha kan :

E bro Gembre,

Pouezus bras eo ar c’han e sevenadur Kembre. Adalek ar skol kentañ derez e vez desket kanañ d’ar vugale. Niverus eo al lazoù-kanañ. En Eisteddfodau e kenstrivont, pe kanañ a reont en abadennoù a vez er chapelioù.  

Evit a sell ouzh  ar sonerezh eo deuet ar c’hiz gant an delenn en-dro. Pa vez distaget barzhonegoù e c’haller he c’hlevet ivez. Kavout a reer strolladoù sonerezh hengounel met ivez strolladoù rock ha tekno a ra gant ar c’hembraeg.

Kenstrivadeg vloaz ar c’han, ar varzhoniezh hag an dañs Gwyl Cerdd Dant. Cheñch lec’h a ra bep bloaz evel an Eisteddfodau.

E Breizh,

Ul lañs nevez a zo gant sonerezh Breizh evel ma zo gant an dañs. Bez ‘zo bagadoù e-leizh, o kenstrivañ, o seniñ er festivalioù pe er festoù-noz.

Diazez ar bagad eo ar bombardoù, ar biniaouioù hag an toumperezh. A-wezhioù e kaver sonerien bioloñs, telenn, pe c’hoazh gitar o vont d’o heul. Gant ar penn-soner e vez renet ar bagad.

Gant sonerien, kanerien kan-ha-diskan ha strolladoù e vez graet ar festoù-noz hag ar festoù-deiz. Gant binviji da c’hwezhañ e-barzh e ra ar sonerien : bombard ha binioù. Un doare kanañ eo ar c’han-ha-diskan : kregiñ a ra ar c’haner e-unan ha gant an diskaner e vez echuet ar frazenn a-raok e vefe echu gant ar c’haner, evit eilpennañ ar frazenn div wezh. Ha d’ar c’haner en-dro evit an eil frazenn.

Berzh o deus graet ar strolladoù hengounel er bloavezhioù 70. D’ar mare-se e raent gant binviji hengounel, pa reont kalz gant gitaroù, orglez hag all d’an deiz a hiziv. Diwar vremañ zo lod a zo muioc’h hengounel, ha lod all tost d’un doare « rock breizhat », ha gant reoù all e vez tostaet eus muzikoù all ar bed.

Barzhoniezh:

E bro Gembre :

Barzhoniezh a vez graet e Kembre abaoe ar 6^vet kantved. A bouez bras eo e sevenadur Kembre, ha neuze ez adkaver anezhi en Eisteddfodau. Div arouez-trec’h a zo da c’hounit en Eisteddfod vroadel : ar gador hag ar gurunenn. Div genstrivadeg disheñvel mat int.

Reolennoù strizh a zo evit gounit ar gador. Ar reolennoù-se a c’haller deskiñ e-kerz kentelioù-noz e Kerdiz pe e Caerfyrddin da skouer. Un dek bennak a dud a gemer perzh er genstrivadeg. Dre vras zo daou-ugent den a gemer perzh e kenstrivadeg ar gurunenn. Reolennoù nebeutoc’h strizhha barzhoneg un tamm laoskoc’h. Bep bloaz e ranker doujañ ouzh un tem.

« Stompau » a vez graet ivez. Un nebeud munutennoù a zo gant pep hini evit lenn e varzhoneg dirak ar publik. Gantañ eo e vez barnet al lennerien ha dibabet piv a lenno da heul.

E Breizh :

Dre ma oa bet dilezet ar brezhoneg gant an uhelidi adalek an 10^vet kantved eo chomet poblek ar varzhoniezh vrezhonek betek an 19^vet kantved. Lennegezh dre gomz a reer anezhi. Gant Kervarker eo bet dastumet kanaouennoù, strobet er « Barzhaz Breizh » en 19^vet kantved. Skouerioù deus an doare barzhoniezh-se eo ar c’hanaouennoù-se.

Er varzhoniezh vrezhonek evel en hini bro Gembre e kaver estreget rimoù en diwezh met ivez e-barzh ar gwerzennoù. Graet e vez klotennoù diabarzh anezho.

Bez zo atav eus ar varzhoniezh e Breizh. Nebeut anavezet eo gant an dud abalamour d’an diouer a blas a zo gouestlet dezhi er radio, en tele hag er c’hazetennoù. Brezhoneg pe c’hallek e c’hall bezañ.