Eus ar 27 d'an 30 A Viz Ebrel 2006 :

beaj da Llandysul

 

 

Un hanter-kant a Blogoniz o deus lestret war ar « Bont ‘n Abad », ur ferry iskis koefet gant ur siminal uhel…  Goude bezañ bet treuzet ar mor disoursi int erruet da Gardiff evit tremen an nozvezh kentañ war Douar Bro Gembre, e leti « Ibis Gate »,  peadra d’en em gavout yac’h-pesk ar mintin war-lec’h. Digouezhet eo ar vandennad e Llandysul a-raok an eur rakgwelet gant ar Gembreiz. Seurt darvoud n’eo ket c’hoarvezet alies e istor ar Gevellañ… Hogen kudenn ebet ! Nemet un digarez da straniñ e straedoù Llandysul… pe da vont d’evañ ur banne e Pub Pont-Tyweli, e tu all ar bont, da larout eo er « Camarthen Shire », stok d’ar  « Ceredigion Shire », hini Llandysul.

                        

 

 

Tout an dud a zo en em gavet da greisteiz er Pozh Hotel tro-dro d’ur “c’hawl” a zigemer (pred engounel a vro Gembre : kig soubenn a vez debret gant fourmaj-laezh ha bara-amanenn !). Goude boued ar c’horf, boued ar spered : Allan Shiers, farder telennoù, ‘n eus graet ur brezegenn diwar-benn istor e stal, a zo bet sikouret gant Europa ( ERDF) evit en em staliañ e skol kozh Llandysul, e lein ar vourc’h. E miz mae 2004 dija, e oa bet kelaouet ar Blogoniz war ar raktrez-se.

                       

 

 

Da heul ar brezegenn eo bet gweladennet ar stal, deuet da vezañ ur gwir embregerezh anvet TELYNAU TEIFI (Telennoù an Teifi). E-pad 30 bloaz ha muioc’h memes, ‘n eus graet Allan kantadoù a binvioù en ur mod artizanel. C’hoant ‘n eus bet brasaat ar produiñ, oc’h implij an teknologiezhioù nevez, en ur chom aketus memestra d’ober labour mat. E bal a oa bevaat ar boaz da c’hoari telenn e Bro Gembre, “Bro an delenn”. Telennoù “Telynau Teifi” a zo solut ha fiziapl, rak an danvezioù a zo dibabet aketus-kenañ. Seniñ a reont sklaer, heson ha tomm. Pep hini a zo bet gouest d’en em gendrec’hiñ o spinañ ar c’hordennoù hud, pe, suroc’h, o selaou Helena Lewis o c’hoari, da gentañ er stal, ha goude, er “porzh-skol”. A-raok en em guitaat, war-zigarez kaout un tañva eus  an deiz  war-lec’h,  eo bet kanet ar “Bro Gozh” gant ar Gembreiz hag ar Vretoned a-unvouezh dihan heol tomm Llandysul…

            

        

       

 

       

War dro 17e  e oa poent mont da bakañ ar valizennoù chomet fur er c’harr-boutin ha da gejañ gant ar familhoù ostiz evit tremen un abardaezh sioul ganto.

Digouezhet ar sadorn, deiz bras an EISTEDDFOD, fardet evit ar wech kentañ gant hor mignoned diwar patrom Eisteddfod Bras Bro Gembre a vez aozet bep bloaz e-pad sizhunvezh kentañ miz Eost en ur gêr disheñvel bep tro. Ur gouel sevenadurel ramzel eo an Eisteddfod. Kinnig a ra abadennoù sonerezh, kan, lazhkan evel just, barzhoniezh, dañs, diskouezhadegoù a bep seurt, standoù. War bep dachenn, ouzhpenn, ez eus kenstrivadegoù, hag  un enor bras eo bezañ e-touez ar re gentañ. Pakañ enor ne oa pal Eisteddfod Llandysul… met kentoc’h eskemm evit ar blijadur. Pleustradeg diouzh  ar mintin hag arvest war al leurenn vras e-pad an endervezh : kan, barzhoneg, yezh, dañs,  skoulmoù martolod, keginañ, renkañ bleunioù (pik-nik fonnus etre an daou !). Twm Morus, ur barzh brudet e Kembre, ‘n eus renet an abadenn war al leurenn. Bevet ‘n eus eñ dek vloaz e Breizh war-zu Douarnenez ; en e vleud e oa e brezhoneg, hag e galleg ivez (neubeutoc’h !). Disoc’h an eskemmoù-se : ar Vretoned o deus « trec’het » a drugarez d’un notenn iskis, gounezet ganto evit ar c’han : 12 war 10 !

                       

                         

                     

       

                                                

Da 19e30 en em gavas an holl er « Sal Tysul », sal ar gumun, evit an abadenn noz : lid degemer, friko, Jak Y Do Katell Pennaneac’h, prezidantez kuzul gevellañ Plogoneg, tremenet ganti dek miz e Llandysul e-giz “stajerez yaouank Europa” ha desket kembraeg e-keit-se, a zo bet gouest da dreiñ e galleg, war ar prim, prezegenn Moelwen Gwyndaf, prezidantez kuzul  Llandysul, ar pezh ‘n eus frommet meur a hini… Gant ar wastell “deiz-ha-bloaz” eo bet lakaet da gaout soñj e oa bet kroget an darempredoù kentañ etre an div gumun ugent bloaz en a-raok, e 1986. Tro-dro d’ar wastell, an holl brezidanted  abaoe an deroù : Huw Bevan Jones, Moelwen Gwyndaf, Jaklin Pennaneac’h, Jean-Luc Renévot, Katell, ha maer Llandysul, Brian Teifi. Ha peogwir e oa bet desket d’ober krampouezh en Eisteddfod, profet eo bet d’ar Gembreiz… ur bilig !  E-pad ehan-arvest Jak Y Do, ar  “strollad-kan” Plogoneg, krouet evit prientiñ ar veaj, ‘n eus lammet war al leurenn, heuliet gant un Twm Morus dispont. Kanet o deus gant kalz a birvidigezh !

                                        

 

Sul 30 : mintinvezh ha merenn gant an ostizi. Da 15e e oa deuet poent kimiadiñ ha mont en-dro gant an hent davet Plymouth, ar “Bont ‘n Abad” (nozvezh war ar vag), ha Plogoneg d’ar c’hentañ a viz mae, diouzh ar mintin.

             

POB HWYL !  KENAVO !

 

 

                                      Cymraeg                      Brezhoneg                     English                       Français